Annelies Vossen illustrator vaan Mien Ierste Wäördsjes

Aofgeloupe juni kraog iech ‘nen email vaan Veldeke Krink Mestreech mèt de vraog of iech eventueel ‘n opdrach wouw aonnumme.

‘t Góng um ’n dictionairke veur kinder mèt veerskes boe illustraties bij geteikend móste weure. Iech naom de opdrach mèt plezeer aon, ouch vaanwege ‘t Mestreechs.

‘t Waor al ‘nen tied geleie tot iech veur ‘nen opdrachgever gewèrk had. In de jaore tachteg en negenteg woorte in Nederland väöl opdrachte oetgegeve door oetgeverije vaan tiedsjrifte (Margriet, Libelle, Okki, Taptoe) en sjaolbeuk (vaan Malmberg, Wolters-Noordhoff). De gróp vaan illustratore bestoont altied oet oongeveer dezelfde lui, mèt ‘ne vergeliekbare stijl. De akademies boe veer op hadde gezeten, hechtte väöl wierde aon ’n natuurgetrouwe en anatomisch gooje stijl, die veur ‘t educatieve doel ouch gesjik waor.

Toen de computer opkaom, gónge väöl illustratore dao-op euver. Allewel computers zier hendeg zien, höb iech dao noets mèt kinne teikene. Iech misde ‘t pepier, d’n ink en de pensele, meh kós ouch lesteg euverweeg mèt de knóppe en de oontèlbare meugelekhede vaan de computer. Inmiddels had de merretwèrking ouch zien intrejje gedoon en daomèt waore de tot daan touw redelek stabiele honoraria losgelaote en de verdeenste oonzeker gewore. Laank verhaol kort: iech höb m’ch op aander creatieve zake geriech boe iech väöl plezeer oet haolde en nog ummertouw haol.
Tot Veldeke Mestreech aon de deur klopde.

Inins woort mien realistische teikenstijl weer gevraog en gewaardeerd en kaom ‘t vreugere plezeer weer hielemaol trök wie iech aon ‘t teikene góng. Umtot de samewèrking mèt Fabiënne vaan Ca Va Bien, Judith en Paola vaan Veldeke Mestreech wijer ouch gesmeerd leep, reken iech dit tot ein vaan mien fijnste opdrachte.

Iech hoop netuurlek tot hiel väöl lui zjus zoe zalle genete bij ’t leze vaan Mien ierste wäördsjes, es iech höb gehad bij ‘t make: lekker awwerwèts aon mien teiketaofel, mèt de aquarelpötjes, de kleurpotloejer en de vèltstifte um miech heen.

Bestèl Mien Ierste Wäördsjes in de Kiekoet. Annelies Vossen website

Aander verhaole

De Rink vaan Fons

Op 24 fibberwarie is ’t 100 jaor geleie tot Fons Olterdissen storf. De mieste Mestreechtenere zalle häöm kinne es sjrijver vaan ’t Mestreechs Volksleed. Meh, heer heet zoeväöl mie gedoon veur de stad.

Lees wijer

Beleidsplan 2026–2030: bouwe aon de touwkoms vaan ’t Mestreechs

Tijdens de Algemein Ledevergadering höbbe de leie vaan Veldeke Mestreech ingestump mèt ’t beleidsplan dat ’t bestuur veur de periood 2026–2030 heet geprizzenteerd. In dit plan besjrieve veer wie v’r de koumende jaore wèrke aon ’t versterke, ziechbaar make en doorgeve vaan ’t Mestreechs. ’t Beleidsplan bringk veur ’t iers alle belangrieke oetgangspunte vaan eus organisatie same in ein dokumint. Boe iers informatie verspreid waor euver versjèllende dokuminte, vint me noe eus missie, visie, strategie en organisatie euverziechtelek bijein. Nui zien eus kernweerdes [link nao Visie&Missie-pagina] en de concrete doelstèllinge veur de koumende vief jaor.

Lees wijer

Egidius Cratsborn winner vaan ’t Groet Mestreechs Dictee 2026

In Centre Céramique woort op 22 miert weer ‘t Groet Mestreechs Dictee gehawwe. Mèt mer 2 foute is 't gewónne door Egidius Cratsborn. De nómmers 2 en 3, Yvonne Niël en Lei Bovens (winner vaan veureg jaor) maakde eder mer 9 en 10 foute. Per persoen woorte gemiddeld 37,5 foute in ‘t dictee gemaak. Ongeveer 102 lui doge mèt aon ‘t dictee.

Lees wijer

Leesplenkske 40 jaor

Wee heet 't neet thoes stoon; 't Leesplenkske vaan de Mestreechter taol? In 2023 is 't 40 jaor geleie tot 't Mestreechs Leesplenkske woort geprizzenteerd. En sinds deen tied zien nao sjetting mie es 16.000 leesplenkskes verkoch. Genóg reie um de 40ste verjaordaag te viere, dachte veer zoe.

Lees wijer