Veldeke Krink Mestreech

De Mestreechteneer is gruuts op Mestreech. Neet allein op de historische gebouwe, de Mestreechter Geis en de Vastelaovend. Meh veural ouch de taol maak eus stad bezunder. Al iewelaank is de Mestreechter taol ’n vaste weerde. Oondaanks alle invlode vaan boete-aof sprik nog altied ‘ne groete gróp lui de taol. Daankzij oonder mie Franse en Duitse invlode is die taol zelfs enorm verriek. En ouch noe nog weurt ’t Mestreechs neve ’t Nederlands en ’t Ingels volop gesproke en gesjreve.

Klik hier voor Nederlands

Veldeke Mestreech heet es ideaol tot ’t Mestreechs blijf leve es eigetijdse modern taol. Gesproke en gesjreve, door joonk en aajd en mèt aondach veur spelling, stijl en grammatica.
Daorum zètte veer us mèt leefde in um lui te enthousiasmere um Mestreechs te goon en te blieve spreke en sjrieve.

Dat deit Veldeke Mestreech

  • Reklaam te make veur ’t Mestreechs en ’t gebruuk vaan de taol (promotie)
  • Diech te helpe um Mestreechs te verstoon, te spreke, te leze en/of te sjrieve (educatie)
  • Dien vraoge euver ’t Mestreechs te beantwoorde en/of op die verzeuk d’n tekste te corrigere (consultatie)
  • Beuk, meziek en aander zake wie beveurbeeld ’t Mestreechs leesplenkske oet te bringe in ’t Mestreechs en/of activiteite wie ’t Veldeke Vastelaovendscabberèt te organisere (documentatie)

Dat doen v’r neet allein. Veer doen dat gere same mèt Veldeke Limbörg, aander vereineginge, bedrieve en aander organisaties. En same mèt diech.

Boerum?
Veur ’t Mestreechs!

Lees hei mie euver eus visie en missie

Klik hei veur eus statute

Eus logo

Eus leefde veur de taol zuuste ouch trök in ‘t logo dat veer in 2023 lete vernuie. De Mestreechter taol steit bekind om häör klaanke. Daorum höbbe veer symbole oet ‘t fonetisch alfabet in eus logo opgenome.

Mèt ‘t fonetisch alfabet koume klaanke tot leve. Eder symbool oet dit alfabet liet op unieke meneer zien wieste ‘t woord oetspriks. Zoe beteikent ‘ne punt ‘ne lange klaank. En ‘n –e– op ziene kop is ’n stom –e-, dieste huurs es 2e en 3e in Veldeke en netuurlek in Mestreech. Daorum is dit ‘n opvallend oonderdeil vaan eus logo. De puntsjes en striepe verwieze nao de klaanke. 

Veldeke Mestreech logo
/ʃəˈvʀɒˑj/
sjevraoj