Veldeke Krink Mestreech is bezunder gruuts op deze nuien oetgaof. “V’r zien hiel gruuts tot v’r mèt dit boek neet allein de Mestreechse taol kinne promote, mer ouch e stökske vaan de rieke historie vaan Mestreech kinne deile mèt de jongste ginneraties,” zeet Carlo Schrijnemaekers, veurzitter vaan Veldeke Krink Mestreech. “’t Is ’n ier um dit verhaol in euse eige taol tot leve te brenge. En dage alle kinder oet ’t verhaol te leze in ’t Mestreechs. En aanders wel de awwers, ama’s en ampa’s um ’t de kinder veur te leze.”
‘’n Knikoug vaan ’ne Mosasaurus’ volg de avonture vaan Laila en Jelle, twie vrunsjes die ’n bezunder kinnesmaking höbbe mèt ’ne mosasaurus, ’n fascinerend prehistorisch bies dat in de umgeving vaan Mestreech leefde. ’t Verhaol gief kinder ’n magische kennismaking mèt zoewel de Mestreechter taol es de historie vaan hun stad.
’t Boek is te koop via euze Kiekoet en oonder mie bij Bookhandel Dominicanen in Mestreech, veur de pries vaan € 9,99. Dees oetgaof is ’n unieke kans um kinder op ’n späölse meneer in aanraking te laote koume mèt ’t Mestreechs en tegelieker te laote liere euver Bèr en al die aander mosasaurusse.
Veur mie informatie euver Ontmoet Bèr – Mosasaurus Experience in ’t Natuurhistorisch Museum kinste terech op: www.nhmmaastricht.nl/
