Speulentere Mestreechs liere sjrieve?

Speulentere Mestreechs liere sjrieve? Dat kin mèt de foonkelnuien app Speulentere Spelle vaan de Limbörgse Academie en Veldeke Krink Mestreech. D'n app is gratis besjikbaar veur zoewel Android- es Apple-gebrukers.

Diech bis ‘ne Tóp-Sjeng!
Mèt Speulentere Spelle lierste speulentere wieste die typische Mestreechse klaanke en wäörd perfek sjrijfs. Speul d’n app wienie en boestiech wèls, en wèrk touw nao de ultieme Groete Indtoets.
Weur ‘nen echter perfesser in ’t Mestreechs sjrieve. Speul, lier en bewies tots diech ’t Mestreechs in de vingers höbs. Verdeens diech nao aofloup vaan Speulentere Spelle d’n titel Tóp-Sjeng?

Späölselkes
Aon de hand vaan teks en geluidsfragminte lierste stepke veur stepke ’t sjrieve in ’t Mestreechs.Tes denao door ’t speule vaan versjèllende späölselks dien kinnes. Wie gawwer totste ’t zjuste antwoord giefs, wie mie punte. Bij genóg punte kinste door nao ’t volgend speul

‘ne Belaankrieke stap veur de Limbörgse taol
Regionaol taole wie ’t Limbörgs stoon mie en mie in de belaankstèlling. Zie drage neet allein bij aon ’t cultureel erfgood, meh versterke ouch de regionaol identiteit. “Mèt dezen app zètte veer ‘ne belaankrieke stap veur ’t behaajd en de promotie vaan eus taol. Door digitaol technologie en gamificatie in te zètte, make veer ’t liere sjrieve devaan aontrèkkeleker veur joonk en aajd,” zoe Carlo Schrijnemaekers, veurzitter vaan Veldeke Krink Mestreech, en Yuri Michielsen, veurzitter vaan de Limbörgse Academie.

Speulentere Spelle is tot stand gekoume in opdrach vaan de gemeinte Mestreech. D’n techniek is oontwikkeld door ’t Mestreechs bedrief Goal043. De technologie en liermethodiek achter d’n app zien zoe ineingezat tot ze in de touwkoms ouch touwgepas kinne weure op aander dialekte vaan ’t Limbörgs.

Klaor deveur?
Daan Sjeng aon de geng mèt Speulentere Spelle! Download direk d’n app en begin vendaog nog mèt ’t sjrieve in ’t Mestreechs.

Aander verhaole

Leesplenkske 40 jaor

Wee heet 't neet thoes stoon; 't Leesplenkske vaan de Mestreechter taol? In 2023 is 't 40 jaor geleie tot 't Mestreechs Leesplenkske woort geprizzenteerd. En sinds deen tied zien nao sjetting mie es 16.000 leesplenkskes verkoch. Genóg reie um de 40ste verjaordaag te viere, dachte veer zoe.

Seksime, zuug ‘t, beneum ‘t, stop ’t

Seksime is ‘n väöl besproke oonderwerp en daorum heet ‘t Human Rights Channel vaan de Raod vaan Europa ‘n manifest tege seksisme gemaak. Neve ‘n oetgebreide oetlègk euver ‘t oonderwèrp, bevat ‘t manifest ouch ‘ne kwis boemètste tes in welke maote totste zelf seksistisch bis. Um zoe väöl meugelek Europeaone te bereike, is ‘t manifest in väöl Europese taole. En dat is nog neet alles, ‘t is ouch vertaold in versjèllende regionaole taole, boe-oonder ’t Mestreechs. Veldeke Mestreech moch de Limbörgse vertaoling verzörge, die d’n titel Seksime, zuug ‘t, beneum ‘t, stop ’t kraog.
‘n Bezundere opdrach boe veer mèt väöl plezeer aon höbbe gewèrk.

Trökblik op ‘t vastelaovendssezoen

Dao zien ze weer, De Tempeleers! Neve de jaorlekse Vastelaovendsgezèt, doen veer es Veldeke Mestreech nog mie veur deze sjoen organisatie. Eder jaar prizzentere de Tempeleers hun jaorverslaag roond de 11e vaan de 11e. Zie loere mèt foto’s en verhaole trök op ‘t aofgeloupe carnevalssezoen. Zoe oontsteit ‘n prachteg tiedsdocumint vaan ’t sjoenste fies vaan ‘t jaor. ‘t Is dus neet zoe gek tot ‘t jaorverslaag door väöl Mestreechtenere weurt geleze! Uiteraard is dit jaorverslaag gehiel in ’t Mestreechs gesjreve. Veldeke Mestreech deit al jaore de spellingscorrectie vaan dit jaorverslaag en genete daan weer vaan de trökblik op e sjoen vastelaovendssezoen!

Annelies Vossen illustrator vaan Mien Ierste Wäördsjes

Aofgeloupe juni kraog iech ‘nen email vaan Veldeke Krink Mestreech mèt de vraog of iech eventueel ‘n opdrach wouw aonnumme.