Groet Mestreechs Dictee 2023

Groet Mestreechs Dictee 2023

Lótsj, kuusj, gezèt en bougie. Nog eve de wäörd vaan ’t Mestreechs leesplenkske rippetere.
Mèt e lekker teske koffie zit ederein in ‘t Centre Céramique geprippereerd veur ’t Groet Mestreechs Dictee vaan 2023.

Gesjreve door Lina Gulikers-Bastiaens

’t Dictee steit dit jaor in ’t teike vaan ’t veertegjaoreg zjubelei vaan ’t Mestreechs leesplenkske, gesjreve door Phil Dumoulin.
Phil vertèlt tot ’t leesplenkske zevetien wäörd tèlt en heer dao zevetien zinne mèt bedach heet.
Wie heer de zinne veurlaos kloonk gelach, meh ouch regelmaoteg gezöch.
‘’Noondepie dat is bès lesteg’’ ‘’Gelökkeg höb iech de zevetien wäörd vaan ’t leesplenkske gegarrandeerd good’’, kloonk ’t oonder de deilnummers.
Hortense begós mèt ’t veurleze vaan de zinne. Nao ’n haaf oor sjrieve, striepe, verbetere, móste veer ’t dictee daan toch ech inlievere.

Zoe’n daarteg correctore höbbe ziech vervolges geboge euver al die dictees, oonderwijl ’t Mestreechs Salonorkes o.l.v. André Rieu de deilnummers ammeseerde mèt hun prachtege klaanke. Ederein kós eve oontspanne en genete vaan de sjoene meziek.
Mèt e zier groet applaus woort ’t Dictee Dansant aofgeslote. Spóntaon späölde ’t Mestreechs Salonorkes e stök vaan ‘t Mestreechs volksleed en ‘’Mestreech is neet breid, meh Mestreech dat is laank’’. Ederein zóng in koer mèt wat manjefiek kloonk in de groete hal vaan ’t Centre Céramique. Toen waor ’t tied veur d’n oetslaag.

Wee heet ’t dictee 2023 ’t bèste gesjreve?

Thea van Thor-van Nunspeet doog dat ’t bèste. Mèt mer 5 fout woort zie winner vaan ’t Groet Mestreechs Dictee 2023. In 2019 had zie ouch al ‘ne kier gewónne. De nómmers 2 en 3, Eddy Zeelen en Marij Bonnemayer, maakde 6 en 7 fout.

Bekans 60 lui doge ‘officieel’ mèt en maakde gemiddeld 30 fout. Dat is eveväöl es verleie jaor wie d’n teks door Marjorie Rieu, de vrouw vaan André Rieu, woort gesjreve.

 

Winnaar Groet Mestreechs Dictee 2023 - Thea van Thor met voorzitter Carlo Schrijnemaekers en Hortense Brounts
Groet Mestreechs Dictee 2023, Phil Dumoulin, Hortense Brounts en Carlo Schrijnemaekers
Groet Mestreechs Dictee 2023
Groet Mestreechs Dictee 2023
Groet Mestreechs Dictee 2023
Groet Mestreechs Dictee 2023 - Maastrichts Salon Orkest
Groet Mestreechs Dictee 2023 - Maastrichts Salon Orkest - André Rieu

D’n Tóp 10 vaan ‘t Groet Mestreechs Dictee 2023:

1. Thea van Thor-van Nunspeet 5 fout
2. Eddy Zeelen 6 fout
3. Marij Bonnemayer 7 fout
     
4. Manon Vaessen 7 fout*
5. Yvonne Niël 11 fout
  Lou Spronck 11 fout
7. Ronald Colee 12 fout
  Lina Gulikers-Bastiaens 12 fout
  Roy Janssen 12 fout
10. Stefan Gybels 14 fout
  Meike Kerkhofs 14 fout
  Renée Stevens-Schoonbrood 14 fout

*Op basis vaan fout in de bonuswäörd

Aander verhaole

Sjele wawwel in D’n Tempeleer

Väöl Mestreechtenere loere eder jaor denao oet: D’n Tempeleer. De vastelaovendsgezèt vaan Stadsvastelaovendsvereineging De Tempeleers steit vol satire, parodieën en sjele wawwel. De gezèt is volledeg in ’t Mestreechs gesjreve.

Leesplenkske 40 jaor

Wee heet 't neet thoes stoon; 't Leesplenkske vaan de Mestreechter taol? In 2023 is 't 40 jaor geleie tot 't Mestreechs Leesplenkske woort geprizzenteerd. En sinds deen tied zien nao sjetting mie es 16.000 leesplenkskes verkoch. Genóg reie um de 40ste verjaordaag te viere, dachte veer zoe.

Trökblik op ‘t vastelaovendssezoen

Dao zien ze weer, De Tempeleers! Neve de jaorlekse Vastelaovendsgezèt, doen veer es Veldeke Mestreech nog mie veur deze sjoen organisatie. Eder jaar prizzentere de Tempeleers hun jaorverslaag roond de 11e vaan de 11e. Zie loere mèt foto’s en verhaole trök op ‘t aofgeloupe carnevalssezoen. Zoe oontsteit ‘n prachteg tiedsdocumint vaan ’t sjoenste fies vaan ‘t jaor. ‘t Is dus neet zoe gek tot ‘t jaorverslaag door väöl Mestreechtenere weurt geleze! Uiteraard is dit jaorverslaag gehiel in ’t Mestreechs gesjreve. Veldeke Mestreech deit al jaore de spellingscorrectie vaan dit jaorverslaag en genete daan weer vaan de trökblik op e sjoen vastelaovendssezoen!

Rink vaan Fons Olterdissen

De Rink vaan Fons

Op 24 fibberwarie is ’t 100 jaor geleie tot Fons Olterdissen storf. De mieste Mestreechtenere zalle häöm kinne es sjrijver vaan ’t Mestreechs Volksleed. Meh, heer heet zoeväöl mie gedoon veur de stad.