Annelies Vossen illustrator vaan Mien Ierste Wäördsjes

Aofgeloupe juni kraog iech ‘nen email vaan Veldeke Krink Mestreech mèt de vraog of iech eventueel ‘n opdrach wouw aonnumme.

‘t Góng um ’n dictionairke veur kinder mèt veerskes boe illustraties bij geteikend móste weure. Iech naom de opdrach mèt plezeer aon, ouch vaanwege ‘t Mestreechs.

‘t Waor al ‘nen tied geleie tot iech veur ‘nen opdrachgever gewèrk had. In de jaore tachteg en negenteg woorte in Nederland väöl opdrachte oetgegeve door oetgeverije vaan tiedsjrifte (Margriet, Libelle, Okki, Taptoe) en sjaolbeuk (vaan Malmberg, Wolters-Noordhoff). De gróp vaan illustratore bestoont altied oet oongeveer dezelfde lui, mèt ‘ne vergeliekbare stijl. De akademies boe veer op hadde gezeten, hechtte väöl wierde aon ’n natuurgetrouwe en anatomisch gooje stijl, die veur ‘t educatieve doel ouch gesjik waor.

Toen de computer opkaom, gónge väöl illustratore dao-op euver. Allewel computers zier hendeg zien, höb iech dao noets mèt kinne teikene. Iech misde ‘t pepier, d’n ink en de pensele, meh kós ouch lesteg euverweeg mèt de knóppe en de oontèlbare meugelekhede vaan de computer. Inmiddels had de merretwèrking ouch zien intrejje gedoon en daomèt waore de tot daan touw redelek stabiele honoraria losgelaote en de verdeenste oonzeker gewore. Laank verhaol kort: iech höb m’ch op aander creatieve zake geriech boe iech väöl plezeer oet haolde en nog ummertouw haol.
Tot Veldeke Mestreech aon de deur klopde.

Inins woort mien realistische teikenstijl weer gevraog en gewaardeerd en kaom ‘t vreugere plezeer weer hielemaol trök wie iech aon ‘t teikene góng. Umtot de samewèrking mèt Fabiënne vaan Ca Va Bien, Judith en Paola vaan Veldeke Mestreech wijer ouch gesmeerd leep, reken iech dit tot ein vaan mien fijnste opdrachte.

Iech hoop netuurlek tot hiel väöl lui zjus zoe zalle genete bij ’t leze vaan Mien ierste wäördsjes, es iech höb gehad bij ‘t make: lekker awwerwèts aon mien teiketaofel, mèt de aquarelpötjes, de kleurpotloejer en de vèltstifte um miech heen.

Bestèl Mien Ierste Wäördsjes in de Kiekoet. Annelies Vossen website

Aander verhaole

Seksime, zuug ‘t, beneum ‘t, stop ’t

Seksime is ‘n väöl besproke oonderwerp en daorum heet ‘t Human Rights Channel vaan de Raod vaan Europa ‘n manifest tege seksisme gemaak. Neve ‘n oetgebreide oetlègk euver ‘t oonderwèrp, bevat ‘t manifest ouch ‘ne kwis boemètste tes in welke maote totste zelf seksistisch bis. Um zoe väöl meugelek Europeaone te bereike, is ‘t manifest in väöl Europese taole. En dat is nog neet alles, ‘t is ouch vertaold in versjèllende regionaole taole, boe-oonder ’t Mestreechs. Veldeke Mestreech moch de Limbörgse vertaoling verzörge, die d’n titel Seksime, zuug ‘t, beneum ‘t, stop ’t kraog.
‘n Bezundere opdrach boe veer mèt väöl plezeer aon höbbe gewèrk.

Lees wijer

Patrick Jaspers: Wie is dat, ’t sjrieve vaan e Mestreechs vastelaovensleedsje?

Nouw, eigelek zjus ’t zelfde es ’t sjrieve vaan eder aander leedsje. ’t Groete versjèl zit ‘m veurnaomelek in ’t thema en de wijs. Daoneve dink iech tot ederein dee e leedsje sjrijf veural ‘ne geistege geis moot höbbe. ’t Winne vaan ’t vastelaovendsleedsje is in gein wäörd te besjrieve. Zeker umtot ’t veur miech d’n ierste kier waor. Dat te kinne deile mèt mien vrun vaan “de Aspergepiepers” waor ouch e sjoen momint. De reis dao naotouw en alles wat denao op diech aofkump, ’t blijf geweldeg. Daan noe ’t perces vaan e leedsje.

Lees wijer

Mie verbinding mèt en tösse inwoeners

In 2022 kaom ‘t stadsbestuur vaan Mestreech mèt e nui coalitieakkoord. D’n titel lojt: Maastricht, stad van verbondenheid. De ambitie is helder: mie verbinding mèt en tösse bewoeners. ‘n Belaankriek oonderdeil daovaan is ’t Mestreechs, boemèt de lui lètterlek en figuurlek dezelfde taol spreke. ‘n Sjoen oonderdeil vaan ‘t akkoord is tot zie initiatieve roond ’t Mestreechs oondersteune. Dao weure veer netuurlek hiel blij vaan! Veer holpe ‘t stadsbestuur daorum ouch mèt de vertaoling vaan ‘t coalitieakkoord nao ’t Mestreechs.

Lees wijer

Leesplenkske 40 jaor

Wee heet 't neet thoes stoon; 't Leesplenkske vaan de Mestreechter taol? In 2023 is 't 40 jaor geleie tot 't Mestreechs Leesplenkske woort geprizzenteerd. En sinds deen tied zien nao sjetting mie es 16.000 leesplenkskes verkoch. Genóg reie um de 40ste verjaordaag te viere, dachte veer zoe.

Lees wijer