gesjreve door Cécile Narinx (2019)
- “Mieljaar,” reep tant Nèske verpópzak. “Bin iech mèt mien bloete veuj örges in getrooje!
- ’n Punaise is ’t neet, die had mie gepits. ’t Liekent miech ieder ’ne kral of zoeget.”
- Wie Nèske ziech bókde, zaog ze zelfs zoonder häöre brèl op te zètte tot ’t ’ne bloodkral waor.
- Ze wis medein tot häör bloodkrallekèttel, die ze oets nao ’n vrijaasj jaore geleie kedo had gekrege vaan Harie, gans verrinneweerd waor.
- Deen Harie, ’t waor ’ne puime dee neet al te propel op z’n eige waor.
- Meh desoondaanks droog heer wel zije pyzjema’s en ’n zèlvere horloge.
- Ouch begaojde heer z’ch ummertouw good aon Nèske häören tête de veau.
- Ouch waor heer intellizjent genóg um te begriepe tot e meidske blij weurt vaan sjoen zjuwiele.
- Ze knikde Harie ze beiprintsje, wat mèt ’n spang op ’t tepiet staok bove de zedeleer, ’n uigske.
- Noe mós iech eigelek nao de zjuweleer, dach Nèske, meh dao höb iech geine zin in.
- Dat is zoe’n awhoor en daobij ’ne klomeleer, es heer al neet kraank is.
- Iech kin miech beter ’ne nuie leefste mèt ’ne bugel cent zeuke.
- Dus trok Nèske häör krolpinne oet en goejde al in häör kalbeske doorein op zeuk nao häör poejerdoes.
- ’t Doorde eve, meh es ze toilèt maakde, kaom ’t z’ch neet zoe nej.
- Daonao doog ze e roed klèdsje aon en häör knijnsvelle jeske en häör peerdshaore stievelkes mèt rijstartele.
- Die had ze jaore geleie vaan Zjeng gekrege veur häöre mei.
- Zuug häör loupe, mien tant Nèske, mèt häör witgepoejerd geziech.
- E spinsleech sjravelentere op häör hekskes op weeg nao de kaffee.
- En zoe zuuste mer totste mèt zin in kleiaasj, zjuwiele en manslui gans gelökkeg aajd kins weure.