Es d’ch iemes zeet totste ze zuus vlege, meint ‘r dèks totste get in d’ne kop höbs wat bekans oonmeugelek liekent. ’t Bèste antwoord dao-op is um te laote zien totste dienen droum wel kins woermake.
Veldeke Mestreech heet zoe’nen droum; ’t Mestreechs veur de volgende ginneraties leveteg hawwe. Door uuch te enthousiasmere en te inspirere um ’t Mestreechs te goon en te blieve gebruke. Gruuts zien v’r daan ouch tot v’r mèt ’t Mestreechs Volleks Tejater ‘ne kammeraot höbbe dee us daomèt verdeenstelek hölp.
Tsjittie Tsjittie Beng Beng is e verhaol vol avontuur, fantasie en oonbegrensde meugelekhede. ‘ne Magischen oto, ‘nen excentrieken oetvinder en ‘nen houp druime die werkelekheid weure. Dat slut prachteg aon bij de missie van ’t Mestreechs Volleks Tejater en Veldeke Krink Mestreech: ‘t laote leve vaan ’t Mestreechs, mèt bezunder aondach veur de jonger ginneraties.
’t Mestreechs Volleks Tejater bezörg uuch neet allein ‘nen oonvergeteleke Mestreechse middag of aovend, meh dreug ouch bij aon ’t Mestreechs. Door te zinge, te spreke en kemedie te speule in eus moojertaol.
Nog sjoener is tot in dees produktie mie es 60 jong lui, tösse de 8 en 27 jaor, mètdoen. Jonges en meidskes oet eus eige stad, die in de Mestreechter taol speule en zinge. Zie zien ’n inspiratie veur hun ginneratie. Want die jonger ginneratie höbbe v’r nudeg bij ’t leveteg hawwe vaan ’t Mestreechs.
Veer hope tot dees productie vaan Tsjittie Tsjittie Beng Beng uuch neet allein ammeseert, meh ouch uuch inspireert um ‘t Mestreech gruuts te blieve gebruke. Laote v’r same blieve druime, creëere en genete in ’t Mestreechs. Mèt eur (klein)kinder, eur naoberse, eur vrun, collega’s en zoe wijer.
Want, oonderwijl in Tsjittie Tsjittie Beng Beng de oto’s vlege en de verbeelding gein grenze kint, hawwe veer same eus taol in beweging. Zoetot us noets iemes zeet ‘Diech zuus ze vlege!’.
Naomes Veldeke Krink Mestreech: Geneet van dees bezunder Mestreechse veurstèlling!
