En toen begós d’n elend, want cent um die plenk te make, hadde veer neet.
Dus beslote veer dat zelf te doen. Mèt eus partners ginge veer aon de slaag in
’t atelier vaan euzen habsjaar, Sjo Hustinx. Op advies vaan de pa vaan eus
sikkertares Annie, meubelmeker-in-röste Harie Schijns, zatte veer de letsjes vas
mèt klein kopere negelkes. Wie dèks iemes op z’n vinger hojde, weit iech neet mie,
meh tot hilariteit vaan de res vaan de gróp waor ’t ajaj-gekeeks neet vaan de loch.
Naotot veer zoe’n 700 plenk klaor hadde, voonte veer ’t sjoen gewees.
Veer rizzerveerde ‘ne zaol boe e paar hoonderd lui in kóste in wat toen ’t Maospaviljoen
hèdde en wachde aof tot vriedag 19 augustus. In de weke veuraof maakde
broeder Piet Sewalt de teikeninge veur de plaank en maakde iech 17 veerskes,
veur eder woord eint.
De introductie vaan de Leesplaank door Phil Dumoulin
Naotot ’t Stuur in ’t veurjaor vaan 1983 beslote had e Mestreechs Leesplenkske te
oontwerpe, ginge Bèr Essers -Heer kaom mèt ’t idee-, Pol Brounts, Louis van de
Bongaert en iech zag de gek de 17 wäörd oetzeuke die op de plaank móste koume
te stoon.
En toen braok de hèl los. Wied veur 8 oor zaot de zaol knatsj vol. De sjuifdeure
achterin woorte al gaw aon de kant gesjove, zoetot de capaciteit verdobbeld kós
weure, meh ouch dat waor neet genóg veur alle hoonderde lui die acte-de-présence
gaove. Oet allerlei ander zaole woorte steul gehaold, meh aon ’t ind móste hiel get
lui toch de gansen aovend stoon!
En nao de introductie vaan de Leesplaank en mien veerskes, begós de verkoup.
Bekans niemes koch ein plaank; de mieste leje ginge mèt e stepelke plenkskes
nao hoes. De 700 plenk waore in ‘ne vlook en ‘ne zöch op; mie es 300 plenk
kaome veer tekort! Gelökkeg wouw de BAM op de Breusselestraot us helpe,
zoetot veer de lui e paar weke later kóste gereve.
De Leesplaank begós toen ouch boete Mestreech aon ziene zegetoch: e jaor
later kaom de Valkenbergse leesplaank oet en daonao volgde nog ’n ganse raffel
Limburgse plenk.
De populariteit vaan de noe 40jaorege plaank is oonverminderd groet gebleve;
’t is al jaore de financiële körk boe de Veldeke Krink Mestreech op drijf!
Phil Dumoulin
Aander verhaole
Trökblik op ‘t vastelaovendssezoen
Dao zien ze weer, De Tempeleers! Neve de jaorlekse Vastelaovendsgezèt, doen veer es Veldeke Mestreech nog mie veur deze sjoen organisatie. Eder jaar prizzentere de Tempeleers hun jaorverslaag roond de 11e vaan de 11e. Zie loere mèt foto’s en verhaole trök op ‘t aofgeloupe carnevalssezoen. Zoe oontsteit ‘n prachteg tiedsdocumint vaan ’t sjoenste fies vaan ‘t jaor. ‘t Is dus neet zoe gek tot ‘t jaorverslaag door väöl Mestreechtenere weurt geleze! Uiteraard is dit jaorverslaag gehiel in ’t Mestreechs gesjreve. Veldeke Mestreech deit al jaore de spellingscorrectie vaan dit jaorverslaag en genete daan weer vaan de trökblik op e sjoen vastelaovendssezoen!
Veldgewas is op zeuk nao Mestreechse sjrijvers
Veldgewas is ’n online poëziemagazine wat weurt oetgegeve door Veldeke Limburg. In Veldgewas (nao ’t “weeldreg veldgewas” oet ’t Limburgs volksleed) weure 10 kier per jaor gediechte en korte verhaole gepubliceerd in de Limburgse taol. Alle dialekte vaan Noord tot Zuid in de provincie zien daobij welkom. Meh Mestreech blijf daobij get achter. Veer höbbe wel zoe noe en daan tekste gehad vaan Hortense Brounts, vaan Yuri Michielsen en vaan Wim Kallen (‘ne Mestreechteneer dee noe in Sittard woent). Meh dao blijf ’t daan ouch bij, oonderwijl veer devaan euvertuig zien tot dao väöl mie sjrieftalent in Mestreech moot zitte.
Leesplenkske 40 jaor
Wee heet 't neet thoes stoon; 't Leesplenkske vaan de Mestreechter taol? In 2023 is 't 40 jaor geleie tot 't Mestreechs Leesplenkske woort geprizzenteerd. En sinds deen tied zien nao sjetting mie es 16.000 leesplenkskes verkoch. Genóg reie um de 40ste verjaordaag te viere, dachte veer zoe.
’n Knikoug vaan ’ne mosasaurus
’t Natuurhistorisch Museum in Mestreech heet op zoondag 18 augustus bij de opening vaan de nui permanente tentoenstèlling ‘Ontmoet Bèr - Mosasaurus Experience’ e nui kinderprintebook ‘Een knipoog van een Mosasaurus’ geprizzenteerd. Dit boek, gesjreve door de bekinde kinderbokesjrijver Jacques Vriens en geïllustreerd door ivan & ilia, is neve ’t Nederlands ouch in ’t Mestreechs versjijnt oonder d’n titel ‘’n Knikoug vaan ’ne mosasaurus’. ’t Book is door Desirée Verbeet same mèt Veldeke Krink Mestreech vertaold.