Lei Bovens is de winner vaan ’t Groet Mestreechs Dictee 2025

‘t Groet Mestreechs Dictee 2025 dat zoondag 1 juni woort gehawwe in het Centre Céramique is mèt mer 5 foute gewónne door Lei Bovens. De nómmers 2 en 3, Vivianne Rijnders en Manon Vaessen maakde eder mer 11 en 14 foute. Per persoen woorte gemiddeld 32,4 foute in ‘t dictee gemaak. Mie es 90 lui doge mèt aon ‘t dictee.

‘n Kemissie vaan Sintervaos
D’n teks vaan ‘t Groet Mestreechs Dictee 2025 had es thema, ‘n kemissie vaan Sintervaos aon de Mestreechteneer. ‘t Dictee is gesjreve door Theo Bovens en Jan Janssen en had väöl sjoen Mestreechse wäörd wie: brögkebouwers, naoventrint en rillekwieje. De kemissie van Sint Servaos gaof ouch ‘ne knikoug nao de Heilegdomsvaart.

‘Veur spek en boene’
Neve de 62 fanatieke deilnummers, doge dit jaor mie es 30 enthousiaste lui ‘t dictee veur ‘spek en bonen’ mèt. Veur väöle ‘n gooj oefening um ’t gesjreve Mestreechs te liere. Zie kóste nao aofloup hun dictee zelf corrigere aon de hand vaan d’n officiële dicteeteks.

Vaan harte perficia aon Lei en alle aandere deilnummers vaan ’t Groet Mestreechs Dictee: winne is sjiek en mètdoen zoe neet nog sjieker!
Beloer hei ’t dictee vaan dit jaor.

Volgend jaor ouch debij zien? Weur daan vrund vaan Veldeke of lid vaan Veldeke Krink Mestreech en krijg es ierste beriech.

Aander verhaole

Veldgewas is op zeuk nao Mestreechse sjrijvers

Veldgewas is ’n online poëziemagazine wat weurt oetgegeve door Veldeke Limburg. In Veldgewas (nao ’t “weeldreg veldgewas” oet ’t Limburgs volksleed) weure 10 kier per jaor gediechte en korte verhaole gepubliceerd in de Limburgse taol. Alle dialekte vaan Noord tot Zuid in de provincie zien daobij welkom. Meh Mestreech blijf daobij get achter. Veer höbbe wel zoe noe en daan tekste gehad vaan Hortense Brounts, vaan Yuri Michielsen en vaan Wim Kallen (‘ne Mestreechteneer dee noe in Sittard woent). Meh dao blijf ’t daan ouch bij, oonderwijl veer devaan euvertuig zien tot dao väöl mie sjrieftalent in Mestreech moot zitte.

Lees wijer

Mie verbinding mèt en tösse inwoeners

In 2022 kaom ‘t stadsbestuur vaan Mestreech mèt e nui coalitieakkoord. D’n titel lojt: Maastricht, stad van verbondenheid. De ambitie is helder: mie verbinding mèt en tösse bewoeners. ‘n Belaankriek oonderdeil daovaan is ’t Mestreechs, boemèt de lui lètterlek en figuurlek dezelfde taol spreke. ‘n Sjoen oonderdeil vaan ‘t akkoord is tot zie initiatieve roond ’t Mestreechs oondersteune. Dao weure veer netuurlek hiel blij vaan! Veer holpe ‘t stadsbestuur daorum ouch mèt de vertaoling vaan ‘t coalitieakkoord nao ’t Mestreechs.

Lees wijer

Trökblik op ‘t vastelaovendssezoen

Dao zien ze weer, De Tempeleers! Neve de jaorlekse Vastelaovendsgezèt, doen veer es Veldeke Mestreech nog mie veur deze sjoen organisatie. Eder jaar prizzentere de Tempeleers hun jaorverslaag roond de 11e vaan de 11e. Zie loere mèt foto’s en verhaole trök op ‘t aofgeloupe carnevalssezoen. Zoe oontsteit ‘n prachteg tiedsdocumint vaan ’t sjoenste fies vaan ‘t jaor. ‘t Is dus neet zoe gek tot ‘t jaorverslaag door väöl Mestreechtenere weurt geleze! Uiteraard is dit jaorverslaag gehiel in ’t Mestreechs gesjreve. Veldeke Mestreech deit al jaore de spellingscorrectie vaan dit jaorverslaag en genete daan weer vaan de trökblik op e sjoen vastelaovendssezoen!

Lees wijer

Drei kier pries veur Thea van Thor-van Nunspeet

Veur d’n derde kier maag Thea van Thor-Van Nunspeet ziech mèt mer veer foute, winner neume van ’t Groet Mestreechs Dictee 2024. In 2019 en 2023 góng zie ouch al met de ier strieke. De nómmers twie en drei - Eddy Zeelen en Manon Vaesen - maakde eder zeve foute. De bonuswäörd wie: wèthawwer, baoj, aperpo en raodsmannifèstatie, gaove daan ouch d’n doorslaag.

Lees wijer