Egidius Cratsborn winner vaan 't Groet Mestreechs Dictee 2026

In Centre Céramique woort op 22 miert weer ‘t Groet Mestreechs Dictee gehawwe. Mèt mer 2 foute is 't gewónne door Egidius Cratsborn. De nómmers 2 en 3, Yvonne Niël en Lei Bovens (winner vaan veureg jaor) maakde eder mer 9 en 10 foute. Per persoen woorte gemiddeld 37,5 foute in ‘t dictee gemaak. Ongeveer 102 lui doge mèt aon ‘t dictee.

’n Hommaasj aon ’t Mestreechs
t Groet Mestreechs Dictee is dit jaor gesjreve door niemes minder es Hortense Brounts. Es veurmaoleg veurzitter vaan Veldeke Mestreech en jaore mètwerking aon ’t Groet Mestreechs Dictee, heetzie nog eine kier zelf de pen ter hand genoome veur – en ’n hommaasj te bringe aon – de Mestreechter taol.

‘Veur spek en boene’
Neve de fanatieke deilnummers, doge dit jaor ouch enthousiaste lui mèt veur ‘spek en bonen’. Veur väöle ‘n gooj oefening um ’t gesjreve Mestreechs te liere. Zie kóste nao aofloup hun dictee zelf corrigere aon de hand vaan d’n officiële dicteeteks. Beloer hei ’t dictee vaan dit jaor.

Vaan harte perficia aon Egidius en alle aandere deilnummers vaan ’t Groet Mestreechs Dictee: winne is sjiek en mètdoen zoe neet nog sjieker!

Tóp 10
1. Egidius Cratsborn mèt 2 foute
2. Yvonne Niël mèt 9 foute
3. Lei Bovens mèt 10 foute
4. Marij Bonnemayer, Dirk van Oosten en Eddy Zeelen mèt 11 foute
5. Ronald Colee mèt 12 foute
6. Vivianne Rijnders en Manon Vaessen mèt 14 foute
7. Johan Moes en Lou Spronck mèt 15 foute
8. Roy Janssen, Meike Kerkhofs en Jos Van Herpen mèt 16 foute
9. Melissa Brüll en James Tyndall mèt 18 foute
10. Miep Kerkhoffs mèt 19 foute

Volgend jaor ouch debij zien? Weur daan vrund vaan Veldeke of lid vaan Veldeke Krink Mestreech en krijg es ierste beriech.

Aander verhaole

Mie verbinding mèt en tösse inwoeners

In 2022 kaom ‘t stadsbestuur vaan Mestreech mèt e nui coalitieakkoord. D’n titel lojt: Maastricht, stad van verbondenheid. De ambitie is helder: mie verbinding mèt en tösse bewoeners. ‘n Belaankriek oonderdeil daovaan is ’t Mestreechs, boemèt de lui lètterlek en figuurlek dezelfde taol spreke. ‘n Sjoen oonderdeil vaan ‘t akkoord is tot zie initiatieve roond ’t Mestreechs oondersteune. Dao weure veer netuurlek hiel blij vaan! Veer holpe ‘t stadsbestuur daorum ouch mèt de vertaoling vaan ‘t coalitieakkoord nao ’t Mestreechs.

Lees wijer

Poëzieweek kiekoet wandeling

Vaan 29 jannewarie t/m 4 fibberwarie voont de jaorlekse Poëzieweek plaots. Um dit neet zoe mer veurbij te laote goon, organiseerde veer ‘n ‘Veldeke poëzie kiekoet wandeling’: ‘n rót langs 13 versjèllende oondernummers en organisaties in Mestreech die hunne kiekoet umtouverde tot ‘n klein poëziebuun. Op dees pagina deile veer gere de gediechte en mie info euver de sjrijvers.

Lees wijer

Eve oonder us

Mesjiens vraog geer uuch al ins aof wie tot zoe program vaan ’t aajdjaorscabberèt tot stand kump? Veer goon uuch netuurlek neet alles vertèlle meh dit is zoe oongeveer wie veer dat aonpakke.

Lees wijer

Beleidsplan 2026–2030: bouwe aon de touwkoms vaan ’t Mestreechs

Tijdens de Algemein Ledevergadering höbbe de leie vaan Veldeke Mestreech ingestump mèt ’t beleidsplan dat ’t bestuur veur de periood 2026–2030 heet geprizzenteerd. In dit plan besjrieve veer wie v’r de koumende jaore wèrke aon ’t versterke, ziechbaar make en doorgeve vaan ’t Mestreechs. ’t Beleidsplan bringk veur ’t iers alle belangrieke oetgangspunte vaan eus organisatie same in ein dokumint. Boe iers informatie verspreid waor euver versjèllende dokuminte, vint me noe eus missie, visie, strategie en organisatie euverziechtelek bijein.

Lees wijer