’t Mestreechs kleurt de Vastelaovend
Wat opvèlt in die weke, is de rol vaan ’t Mestreechs. Inins, huurste en zuuste euveral eus taol: in leedsjes, touwspraoke en vastelaovendsgezètte, meh ouch in gesprekke -serieus of sjele wawwel- op straot, aon ’t bufèt of al wachtentere bij d’n toilèt. Zelfs op de universiteit en sjaole kloonk ’t Mestreechs. En ’t sjoenste vaan al? Me wis boe v’r ’t euver hadde. Dat liet zien tot Mestreech de res vaan ’t jaor get mie Mestreechs maag hure, neettaan?
Lang leve ’t Mestreechs!
Aofgeloupe Vastelaovend had iech d’n ier um Mestreech te mage veurgoon. In de 4 weke veur de Vastelaovend höb iech mie es 200 bezeuke gebrach um ’t plezeer en gelök vaan Vastelaovend te deile. De meneer boe-op v’r oontvaange woorte, liet zien wat veur veurnaome plaots de prins en de Vastelaovend in Mestreech in numme. Joonk of aajd, boe iech ouch kaom; ’t enthousiasme waor euveral groet en hertverwermend. ’n Periood boe iech en mie femilie gruuts en mèt hiel väöl plezeer aon zal trökdinke
Moojertaol vaan de Vastelaovend
Tot ’t Mestreechs de moojertaol vaan euze Vastelaovend, höbbe v’r te daanke aon de Momus sociëteit. Vlak nao de opriechting in 1839 woort ‘n Groondwèt (hoesriggelemint) opgestèld, mèt 11 artikele. Artikel 1 lojde:
Den ierste artikel de ig ug verhaol
Verget toch neet eur moyerstaol
(…)
Indirek bepaolde De Momus daomèt tot ’t Mestreechs de officieel taol vaan de Vastelaovend woort. En die traditie um in ’t Mestreechs te annoncere, te proclamere en te correspondere is nao mie es 180 jaor nog ummertouw springlevend. Daomèt kleurt ’t Mestreechs al hiel get ginneraties de drei sjoenste daog vaan ’t jaor.
En noe daan?
Noe de rös trök is, blief ein vraog euver: wat te doen mèt ’t Mestreechs in die aander 362 daog?
’t Mestreechs huurt neet allein bij de Vastelaovend. Laote v’r ’t ouch de res vaan ’t jaor klinke in de horeca, winkels, sjaole en op straot. Want es de taol mèt de Vastelaovend wèt te verbinde, zal zie dat ouch de res vaan ’t jaor doen.
Lang leve ’t Mestreechs!
Carlo Schrijnemaekers
Veurzitter Veldeke Mestreech
Stadsprins Carlo I (2025)
Aander verhaole
Drei kier pries veur Thea van Thor-van Nunspeet
Veur d’n derde kier maag Thea van Thor-Van Nunspeet ziech mèt mer veer foute, winner neume van ’t Groet Mestreechs Dictee 2024. In 2019 en 2023 góng zie ouch al met de ier strieke. De nómmers twie en drei - Eddy Zeelen en Manon Vaesen - maakde eder zeve foute. De bonuswäörd wie: wèthawwer, baoj, aperpo en raodsmannifèstatie, gaove daan ouch d’n doorslaag.
Seksime, zuug ‘t, beneum ‘t, stop ’t
Seksime is ‘n väöl besproke oonderwerp en daorum heet ‘t Human Rights Channel vaan de Raod vaan Europa ‘n manifest tege seksisme gemaak. Neve ‘n oetgebreide oetlègk euver ‘t oonderwèrp, bevat ‘t manifest ouch ‘ne kwis boemètste tes in welke maote totste zelf seksistisch bis. Um zoe väöl meugelek Europeaone te bereike, is ‘t manifest in väöl Europese taole. En dat is nog neet alles, ‘t is ouch vertaold in versjèllende regionaole taole, boe-oonder ’t Mestreechs. Veldeke Mestreech moch de Limbörgse vertaoling verzörge, die d’n titel Seksime, zuug ‘t, beneum ‘t, stop ’t kraog.
‘n Bezundere opdrach boe veer mèt väöl plezeer aon höbbe gewèrk.
Keersemes Speurtoch 2024
En...? Höb geer uuch geammeseerd?
Alle antwoorde kinne vinde?
Op dees meneer liert geer eur eige stad op ’n ander meneer kinne.
Hei-oonder vint geer de antwoorde wie ze zouwe mote zien.
Geer maag uuch oonderein dreuver vreigele meh wat hei steit klop.
De zuus ze vlege!
In oktober en november späölt ’t Mestreechs Volleks Tejater mer leefs 14 kier hun nuiste produktie Tsjittie Tsjittie Beng Beng. Veldeke Krink Mestreech moch e stökske sjrieve in ’t programbeukske. D’n teks vint g’r hei-oonder: