Nao de zomer koume veer al ins ‘nen ierste kier bijein mèt de speulers en ‘n ervare “brainstörmster”. Mèt e gleeske vaan ’t ein of ander en get te knawwele, goon veer aon de geng mèt bedinke boe veer ‘t dit jaor op de buun euver goon höbbe.
De gezètte en ’t nuits zien ’n groete inspiratie en wijer alles wat de lui bezeg hèlt en dat zien ouch dèks zake zien die neet in de gezèt stoon. Geer kint uuch mesjiens wel veurstèlle tot mie es de hèlf vaan wat weurt veurgestèld éch neet de buun op kin meh ’t beteikent wel tot veer hiel väöl lache op zoe’nen aovend of middag.
Veer höbbe de luxe tot veer allein mer zake hove aon te drage en daan geit Will gans allein op zien eige kamer aon de geng demèt. Hiel dèks kump get droet wat veer gaaroet neet höbbe besproke. Me wèt ’t noets mèt dee mins meh leuk is ’t altied.
V’r höbbe e vas stramien qua aontalle leedsjes en tekste en Will sjrijf alles. Tege ’t ind vaan de zomer is meistens alles gereid en daan weure de rolle verdeild en goon v’r rippetere. Eder veur ziech én same. V’r spreke mèt Ben ’n aontal zaankrippetities aof en zoe weurt ’t wie langer wie mie “get vaan us”.
De mis-en-scène weurt gezaomelek gemaak. Veer höbbe hölp vaan Katrin die ‘t beeld op de buun bedink en vaan Frans dee us achter de buun hölp mèt alles wat veer nudeg höbbe. D’n daag vaan de ginneraol rippetitie zien veer allemaol nog lang neet zoe wied meh ’t moot en daan geit ’t ouch. Wat us altied op de bein hèlt is ’t plezeer dat veer zelf höbbe mèt ‘t make en oetvoere vaan ’t program en veer hope tot geer eveväöl plezeer höb mèt denao te kieke en luustere.
