- Gere wèl iech uuch laote kinnesmake mèt Sjengske (Zjengske).
- Sjengske heet twelf jaor geleie ’t levensleech gezeen en kraog vaan de wijsvrouw zien ierste fleske mèlk.
- Heer woende al zie ganse leve, mèt zien awwers, twie breurs en zie zusterke, in e kollosaol steine hoes in de Stokstraot.
- Ziene vaajer, Jean, wèrk al jaorelaank es sjietekojleveger bij de gemeinte Mestreech.
- Neve häör daogeleks werk, zoewie ’t verzörge vaan Sjengske en zien femilie, deit moojer vrijwèllegerswerk op de kinderaofdeiling vaan ’t hospitaol.
- Sjengske is ‘nen echte koejong, dee geregeld mèt z’n vrundsjes ströppestreke oethaolt in de binnestad vaan eus sjoen Mestreech.
- In de naobersjap neume ze häöm evels ’t pestoerskeend, umtot heer bij de jurering vaan de kinderteikenwedstrijd vaan de Tempeleers, al dèkser es ins in de prijze is gevalle.
- Sjengske zit in de lèste gróp vaan de liegersjaol.
- Heer blink oet in Aardrijkskunde en Nederlands.
- Dictees make zoonder ‘nen dictionair deit heer minder gere es op zien sjuiftrompöt speule oonder de mezieklès.
- Op zaoterdagmiddag heet Sjengske sjuiftrompötlès bij de zjubilerende Mestreechter Verkennersband.
- Heer spits ziech kier op kier op de optrejjes mèt de Juniorband.
- Sjengske zien ierste optrejje waor op vastelaovendsmaondag, bij de femilieoptoch.
- ’t Mieste bijgebleve vaan dee manjefieke boonte störm, zien de versjèllende pekskes, wie govie, klojn, evermenneke, kótsjeer, sjouweveger, drekmenneke, leiendèkker, sjoester, kleiermeker, lanteriemenneke, nejeers, lomelekriemer, avvekaot, bleeksleger, besjaarmeker, doevemèlker, baoj, mennekesmeker, klokkelojjer, sjóffeleer, hejsemeker en zokkestikker.
- Zelf waor heer verkleid es mèssendeender, naovenant mèt rochèt.
- Oondaanks tot Sjengske pas twelf jaor aajd is, wèt heer ’t al hiel zeker: Prins vaan Groet-Mestreech, dat is zienen droum en moch dat noe neet lökke daan is börgemeister vaan Mestreech ouch good.