Gesjreve door Hortense Brounts
- Pie, maak ins get väöraon en saajel neet zoe, keekde Annie, veer mote us spooje want es veer te laat zien, steit ederein te sjèldere.
- Iech heit Piet, zag heer kneizeteg, mèt ’n t, en heer trok e geziech wie ‘nen oerwörm um te verdutse tot heer ’t neet ammesant voont.
- Heer woende al bekans ’n kwaartiew in Mestreech en kós ’t nog ummertouw neet vele es ziene naom woort vermassekreerd, heer waor nondedjouw toch geine puime.
- En heer had gaaroet geine zin um ziech te hajje um nao d’n theater te goon mèt vreempde en de gansen aovend mèt ’n te ing brook en e te krap jeske ziech te mote maore um te doen es-of heer ziech begaojde.
- Want Annie wouw mèt häöm stóffe bij häör mètwèrkers en es heer neet hiel hel keekde vaan de lach bleef ze lammentere en op häöm chicanere tot heer noets gezèlleg waor.
- Heer wis nog good, tot wie heer Annie lierde kinne, heer al gaw mèrkde tot heer Mestreechs zouw mote praote, wouw heer chance höbbe.
- Wie ze häöm ins aon ’t bufèt vroog um ‘nen ingelender, dach heer tot heer op zeuk mós nao eine dee Ingels praotde.
- Dus kós heer mer beter metein perbere Mestreechs te klasjenere, zoetot heer in kompenei neet wie ‘ne kluteklaos debij stoont.
- Nao bekans 25 jaor verstoont heer alles; heer had allein nog get meujte mèt wäörd wie bubbelesenes, kabberdoes, róchelpötsje, vermiesjèl en ouch versajze had lang gedoord.
- Meh es heer ziech veurstèlde, zag heer altied zier naodrökkelek Piet, mèt ’n t, en daan waor dao altied wel ’n awmem die sebiet vroog of heer soms kraank waor mèt z’nen thee.
- Heer gönde hun die fóf en lachde kwansijs oonnuzel zoetot ze ziech um häöm kóste besjäöre, want heer wis tot Annie daan leiherteg woort en dao kós heer vaan proffitere.
- Pie, keekde Annie weer, boe blijfste? Heer knuipde zien krevat en keek nog ‘ne kier in de spiegel en zag hel-op: Iech bin Piet, mèt ’n t, en heer trok ’n oonnuzel geziech debij.
Bonuswäörd
- Aoflókse
- Koljee / coljee
- Kinderkräöjer
- Kolemarsjang
- Laankdräöjeteg
- Lavvabo
- Oetbónzjoere
- Pikkelielie
- Salu
- Trieko