‘n Kemissie vaan Sintervaos
Cónteks: is ’nen ‘ope breef’ vaan Sintervaos oet d’n hiemel.
- Aon de lede vaan de vereineging ’t Graaf vaan Sintervaos en al die aander brögkebouwers.
Preses Theo Bovens, Maternushöfke, in de naoventrint vaan mien graafkèrk.
Bèsten Thei, - Mèt permissie wèl iech diech eve derangere in alle veurbereiinge veur de koumenden Heilegdomsvaart, dit jaor in juni, zestienhoonderdeinentwinteg jaor naotot iech bin goon hiemele.
- Iech weit tot obbenuits väöl dames, hiere, meidskes en jungskes ziech in hun sjoenste klèdsjes, rokkostuums, slippejasse, jacquètte, uniforme en mantele prizzentere en ze zien stök veur stök sjiek gecoiffeerd.
- Zuug ze astrein ins goon, mèt hun sjienheilege geziechte drage ze de rillekwieje vaan miech en vaan mien zaoleg verklaorde kammeraote.
- Ze sleipe mèt drappo’s, dikklamere tekste, zwejje mèt e wierouksvaat en make magnefiek meziek.
- De Cappella, de mèssedeenders, de keplaons, pestuurs, koerezele en bisjoppe make de hoegmèsse tot e spectaculair gebäöre.
- Meh hei in d’n hiemel brik de hèl los umtot me vint tot Mestreech en de Zjenge e striepke veur höbbe bij Slivvenhier; heibove zien ze roed, geel en greun vaan zjaloezei.
- Noe maagste verwachte tot heilege ziech rizzenabeler opstèlle, meh este ieweg moos leve, slup wel ins get oondäög drin.
- Höllege Maria, menier de president, maag ’t e bitsje minder? Mote ’t wel hoonderdviefenviefteg eveneminte, zeve exposities, ach konzèrs en God wèt wat nog allemaol zien?
- Meh stèllekes geneet iech vaan eur devotie gaondeweeg de pèlgrimaasj, en zoe bouwe veer same ‘n brögk, es veer eus zevejaorleks fees viere.
Waor geteikend, Sintervaos