ETE
Gesjreve door börgemeisterse Annemarie Penn-ter Strake (2018)
- De wèts allewijl neet mie watste in d’ne moond maags of moos steke.
- Ederen daag leuste wel in de gezèt totste vaan dit of dat vreiseleke krenkdes krijgs.
- Vreuger staoke de lui zoonder bezej hun versjèt in hunne moond, meh vendaog d’n daag mooste iers Wikipedia debij hole en dao vertèlle ze d’ch totste, um ’ns get te neume, nog neet nao get vaan sókker maags wieze.
- Zelfs broed is bekans verbooje.
- Vreuger kraog e bruutsje nao de percessie e sókkerbruudsje, meh noe zouwste zoe keend dat neet mie dörve aonbeeje es e koppel geëngageerde awwers mèt e groffiäötsje in hun knuipsgaat deneve steit.
- Este al dee flawweköl zouws geluive, kinste zoeget allein nog aon de doeve vore.
- Dat wèlt zègke, es die douf neet douf is, want aanders huurt ze d’ch neet vaanteveure mèt de tuut sjöddele.
- Euver vleis zal iech mer oetsjeie.
- Op mie werk dörf iech neet te zègke tot ’ch m’ch laot haange veur e speebegkske.
- Meh e fien busstökske mèt e geklop eike nump geine miech aof.
- Dat is jummers de bèste boojem veur wee z’ch eine geit pitse.
- En vaan zoervleis blieve ze ouch aof.
- Dat recep vaan vreuger bij us thoes is miech heileg, eins wat zein die bleedsjes sjrieve.
- Dao geit ’t zoewiezoe meistens euver groete teleure mèt wieneg drop.
- Boe iech miech oongegeneerd aon kin begaoje, is bloodweurs mèt eppelkes.
- En dao maag iech daan gere e gleeske aajd bij drinke.
- Meh neet mie es eint,es iech de gelierde maag geluive.
- En miene maan mer twie, zag lès eine op d’n tèllevisie.
- Dee kint z’ch dao-aon sjaggernere en dus pak heer z’ch nog ’n avvekäötsje mèt väöl geklopde roum.
- En, obstenaot, sjöd iech miechzelf daan nog e cógnekske in.