Groet Mestreechs Dictee 2015

Gesjreve door Will Wintjens (2015)

  1. Eder jaor opnui nao de Vastelaovend nump Rita z’ch veur de carnevalskörf ’ns oet te mèste.
  2. ’t Is oongeluifelek wat ’ne mins in de loup vaan de jaore allemaol bijein sjravelt.
  3. ’nen Houp kleiaasj boe geine nog get mèt deit, zoewie dee zjielee vaan ’t jacquèt vaan häöre sjoenpa zaoleger, ’ne cache misère vaan bomma en, zuug dao, de sleip vaan häör eige broetskleid gans oonder de pratsj vaan e paar jaor geleie.
  4. En boeveur heet ze deen trieko zoe lang bewaord?
  5. Dao kump ze mèt häöre kom-’ns-väör vaan noe toch gaaroet neet mie in.
  6. En daan te bedinke wat e spinsleech zie vreuger waor.
  7. Meh noe, eder sókkerkluntsje is eint teväöl en e stökske frangipane, boe ze z’ch vreuger veur leet haange, huurt noe tot de verbooje vröchte.
  8. Meh, wat ligk dao noe tösse get haaf verrinneweerde kiksjozerije?
  9. De wejjer dee ze deen ierste carneval vaan Lewie had gekrege.
  10. Obbins zuut ze z’ch weer stoon op dat brögkske euver de Jeker, es-of ’t gister waor.
  11. Lewie mèt z’n ieweg zwart krevetsje oonder ze clojnspekske, want dat mós veur z’n ma, die aw klappej.
  12. Of Lewie z’ch dee Vastelaovend nog rappeleert, is mer de vraog.
  13. Dee hingk noe mèt die daog allein mer aon ’t bufèt.
  14. En es heer tössedoor eve thoes is, houwt heer z’ch ’t ei speebegkske nao ’t andert in z’ne gieles.
  15. Zie zweert bij e busstökske mèt ei es ’ne gooje boojem.
  16. Trök nao de körf. Wat mooste mèt al die pekskes die de nejjeers vreuger kaom make?
  17. ’t Is toch zun um die weg te goeje.
  18. Wat zie zelf allemaol inein gefisternöld heet, allèh, eweg demèt.
  19. Ouch dat gecrocheerd bluuske wat ze oets in dat twiedehandspetikske in de Hègkestraot had gekoch.
  20. Of toch mer neet?Jeh, zoe maak me z’chzelf ’ne körf wies.