Groet Mestreechs Dictee 2014

gesjreve door Phil Dumoulin (2014)

  1. “Wat ma ouch kook, ’t is ummertouw zjeniaol! Of ’t noe knópsèlderij, kuulderaab of sevoejekuul is, de its d’n vinger debij op!”, zag de jongste vaan de drei zäöns.
  2. Ma griemelde vaan ’t complimint. Ze had ziech de ganse week geprippereerd op dezen aovend.
  3. Iers zouw ze in de knojzege hoeskamer e stökske haozerögk opdene; daonao kraoge ze kabbeljaw, zoe dik wie e busstök.
  4. Es dessert prizzenteerde ma ies mèt alderlei fruit, wie annenas, appelekouw en erebeize.
  5. “Wat ’n delicatèsse! De verdeens e pesteurke!”, reumde pa.
  6. “Zègk pa”, zag zienen ajdste, dee inzjenieur waor, “iech zaog de affiesj vaan ’t Mestreechs dictee. Dat is toch allezeleve get veur diech?”
  7. “Jao, pa, de bis ummertouw zoe geazjiteerd es iemes ’t Mestreechs verrinneweert!”, zag d’n twiede.
  8. “En höb mer geine straank veur ’t przewalskipeerd; hoegoetkump ’t peerd vaan Beiten langs!”, zag d’n derde laammeker.
  9. “Wèlt geer ‘nen awwe zubbedeius besallemandere? Iech daon abseluut noets aon zoeget mèt. Iech haat de wèdiever in dictees. Iech höb ‘ne gegrónden dégoût vaan zoe’n pinnetentie”, zag pa.
  10. “Daobij: iech höb op zoondagmörge miene vasten tuiel en door dee kölkook laot iech mienen daag neet vermassekrere!”
  11. “Dat vèlt miech vaan diech tege”, zag ma,en de zäöns gaove häör mèt hunnen dreie geliek.
  12. ’t Waor dudelek: pa zaot neet te póppele. Meh de ganse kompenei, d’n eine illeganter es d’n andere, maakde pa heurendöl.
  13. Obbins sjriewde heer courageus oet: “Iech gaon!” Ma begós vaan zenewechtegheid te joechele.
  14. D’n daag denao verleet pa ziene ressorrebak en zeukde ziech e sjoen ketojne humme en zie bèste pak oet.
  15. Heer aot ziech ’ne pistolee mèt speebagk en e secijzebruudsje. In eder tes duide ma ’ne keneknab.
  16. Door ’t park en euver de Hoeg Brögk góng ’t nao Plein 1992. In ’t Centre Céramique zat heer ziech achter ’ne krollezjiets.
  17. Toen, um perceis èlf oor, hètde de veurzitster de deilnummers welkom.