Groet Mestreechs Dictee 2013

Gesjreve door Louis van den Bongaert (2013)

  1. ’t Dictee weurt dit jaor gehawwe op d’n derde zoondag nao carneval op ’n locatie bezuie Plein 1992.
  2. Mesjiens is ’t ideaol um deen derde zoondag nao carneval consequent es daotum aon te hawwe.
  3. Es ’t eder jaor ‘tzelfde is, is ’t veur ederein invojdeg te oonthawwe.
  4. Me kint daan mèt Vastelaovend de bamboecheur oethaange en daog vaan blijegheid beleve.
  5. Wie vaanajds geit dat bij us vaan allein, euver straot of aon ’t bufèt.
  6. Mennege verkleider liet z’ch daoveur door ’n nejeers e peske nejje.
  7. Later leze veer wel weer wat veur inzjenieus en miserabel ideeje ’t kabbinèt z’ch mèt die drei daog heet oetgedach.
  8. Miep waor dit jaor verkleid es ’n tiep wat neet kós type.
  9. De kragk had daoveur es equipaasj ‘ne ganse bureau mètgepak oet häor brak en verplaotsde z’ch saajelentere vaan de Vriethof nao ’t Slevrouweplein en trök.
  10. Umtot de bureau daobij ‘ne kier op häöre voot terech waor gekoume, góng ze op Asselegoonsdag veur cónsölt nao d’n dokter.
  11. Dee had häör e puujerke veurgesjreve veur de pijn, get vazelien op häör puteke gesmeerd en ’t wijer es neet ernsteg gekwallificeerd.
  12. Toen zag heer: “Höb iech uuch ouch neet gezeen bij ’t carnevalskonzèr?” en begós te expliquere tot ze de meziek vaan ’t rippertoire zóe móste arrangere tot d’n dirizjent ’t ouch gemekelek kós dirizjere.
  13. “Ligk miech neet te traazjake daomèt, laammeker”, zag Miep ooncontent, en góng vaan d’n dokter via de apthieker nao de sjoester.
  14. Nao de ammesatie vaan de Vastelaovend had de sjeunmeker z’ch metein aon de prakkezatie gezat um mèt de kompenei mèt e vleegmachien de weustenij op te zeuke.
  15. Es ze dat zouwe doen tösse Pinkstere en sakkermintsdaag oontlepe ze de drökde vaan de sjaolvekantie.
  16. Aon de percessie, die cazjueel op d’n ierste Pinksterdaag trok, kóste de manslui vaan de kompenei die bij ’t dregersgilde waore daan nog deilnumme mèt de rillekwie op hunne berie.