- Bij de vogelekouw in ’t stadspark stoont jaorelaank op zoondagmiddag ’n ieswegelke wat de naom ‘Kleine Beer’ droog.
- Es ’t weer naovenant waor, had iech de prezoomptie, doog deen iesmaan gooj zake en stoont dèks ‘ne groete slinger lui veur ’t ruutsje vaan dee wagel.
- Kinder móste op hun tiene stoon um nao binne te kinne loere.
- D’n iesmaan mós ziech evels bókke um nao boete te kieke.
- Aon de roet vaan ’t wegelke hóng e lieske mèt dao-op versjeie soorte ies die heer deen daag verkoch.
- Fenielies had heer altied, mèh ouch eerbeizeies en liechbroen sjókkelateies mèt stökskes sjókkelaat drin.
- Es veer steveg gewandeld hadde en genote hadde vaan de brojn bere Max en Polla mochte vaan ’n ieske koupe. Eder keend wis dat te apprèciëre.
- Dat ging per bölke en per gósting.
- De kós diech bedinke watste priffereerdes, este in de rij stoonts te wachte.
- Este aon de beurt waors, zagste in einen aosem de verlanglieske op en begós dee knouver in alle bek bölkes te sjrape.
- Heer bouwde daan eine gansen torie vaan iesbölkes.
- Daonao kaom de gebrukele vraog vaan deen iesmaan: “slagroum?”
- Es ’t antwoord jao waor, drejde heer bove op deen torie iesbölkes, nog eine rijaloet vaan slagroum.
- De cent woorte op de glaasplaat gelag en daan begós me mèt lekke.
- Iers de slagroum; dee zaot jummers in de weeg, um aon ’t ies te koume.
- Waor ’t werm weer, daan mós vlot gelek weure want ’t ieske smolt gawwer es me lekke kós.
- ’t Ies leep daan euver han en kleier en begaojde de ganse boel.
- De meujerkes waore in alle staote, umtot ’t gevöchelte ’t ies euveral had plakke, die vojlegheid.
- Dèks hooort me ‘ne gaillard sjriewe, es de iesbölkes vaan ’t iestuutsje aofgevalle waore.
- De gejs en eende versjrikde z’ch daoneg en vlöchde ’t water op.
- Wat ‘nen elend op zoe’ne zoondagmiddag!
- In d’n aovend mós ma, ’n vrouw vaan comme ci comme ça, perbere de kinder zoonder väöl behej in bèd te kriege.
- Pa kós z’ch daan rösteg e cógnekske drinke en nao Studio Sport loere.