- De ma vaan Sjarel had zjus de luter weg laote loupe.
- Centrifuzjere bestoont nog neet, alles mós door de vringer.
- Daodoor had ze geinen tied um zelf kemissies te doen.
- Sjarel gaof dao evels ouch op aof, heer kós daan neet goon sjotte.
- Ziene pa waor ouch neet thoes.
- Dee waor op zie werk aon ’t wèrke es sjrienewèrker.
- Vaan ’t drejje aon de vringer had Sjarel zien mam ‘ne pieneleke rögk gekrege.
- “Hool miech ins get bij d’n drogis, want die pijn in mie lief is miech behöbbelek aon ’t traazjake”, zag zien ma.
- D’n drogis, zoe’ne fitsfetser, zag tege Sjarel tot heer beter draon doog nao d’n apthieker te goon, umtot dee zwoerder pèlle en zelfkes had.
- Sjarel voont d’n drogis mer ‘ne ziemelepie.
- De vrouw vaan d’n apthieker waor ouch al neet väöl aanders.
- Die laammeekster vroog: “Aochottechot, wat is d’r aon de hand?”
- Sjarel mós die perneuts perceis vertèlle wat mèt deen ermoodzejjer thoes aon de hand waor.
- Heer kraog evels wel ‘ne menta vaan häör, eine mèt krissie vaan binne.
- Bij de kruieneer mós heer pikkelielie hole.
- Vaan dee maan moch heer twie riggelaote preuve.
- “Dink ste aon de kene?”, vroog heer vaan achter de winkelbaank, “es die diech in diene slókderm terech koume, geis diech miech vaan de geert.”
- ’t Veel Sjarel gelökkeg in tot zien ma ouch nog gevraog had um twie blojtselpupkes mèt te numme.
- Ze waor ’t lievend en ’t bèddegood aon ’t wasse en dat moot wit zien.
- Wat zouwe de naobers aanders zègke es ’t gries en graw aon de waslijn hóng.
- Mèt zien kemissies leep heer rechdoor nao hoes.
- Bamboechere doog heer neet.
- Es geer dat zojt meine, had geer ’t veis mis.
- Trouwens, ’t begós ouch te fiezele of waor dat verbeling?
- Sjarel maakde ziech gaw nao hoes boe petatfrit mèt reberber op häöm stoonte te wachte.
- En wat steit uuch te wachte?