Visie & Missie

Es Veldeke Mestreech hawwe v’r ’t Mestreechs leveteg, veur noe en later. Dat doen v’r vaanoet ‘n dudeleke visie en ‘n bijhurende missie.

Klik hier voor Nederlands

Eus visie

’t Mestreechs leef es eigetijdse en modern taol. Gesproke en gesjreve, door joonk en aajd en mèt aondach veur spelling, stijl en grammatica.

Eus missie

Veer helpe um ’t Mestreechs te verstoon, te spreke, te leze en te sjrieve, mèt de kinnes die veer in hoes höbbe. De kins bij us terech veur advies, tips euver en hölp bij de Mestreechter taol. Ederein dee interesse heet in de taol is vaan harte welkom!

De 4 vaan Veldeke

Veer wèrke aon eus visie en missie mèt hölp vaan de 4 vaan Veldeke:

Promotie
Veer bringe ’t Mestreechs oonder de aondach. Beveurbeeld via eus eige website en social media, meh ouch door de samewèrking aon te goon mèt oondernummers, inwoeners en de gemeinte.

Educatie
Veer liere de lui um ’t Mestreechs te verstoon, te spreke, te leze en te sjrieve.

Documentatie
Veer lègke ’t Mestreechs veur de touwkoms vas, gesproke en gesjreve, in beeld en in geluid.

Consultatie
Veer advisere en helpe bij het sjrieve, spreke, leze en verstoon vaan ’t Mestreechs.

/ɣɛːs/

geis

Eus kernweerdes

Same: Veer zeuke actief verbinding mèt vrijwèllegers, oonderwies, organisaties en euverheid. Same bereike veer mie es allein.
Deskundeg: Veer stoon veur kwaliteit in alles wat v’r doen. Eus projekte en produkte zien gebaseerd op kinnes, zörgvöldegheid en respek veur de taol.
Vernuiend: Veer hoejere traditie, meh dörve te vernuie. Veer oontwikkele frisse projekte, moderne middele en eigentijdse menere um ‘t Mestreechs te laote leve.
Touwgaankelek: Veer make ‘t Mestreechs begriepelek en bereikbaar. Daoneve zien eus activiteite en produkte aontrèkkelek veur ederein.
Betrokke: Veer doen dit oet leefde veur de stad en häör taol. Vaanoet ‘n gedeilde gruutsegheid zètte veer us in um ‘t Mestreechs door te geve aon de volgende ginneraties.