09 fibberwarie 2022 Veldeke Krink Mestreech en Revue aon de Maos zeuke Mestreechs sjrieftalent

Altied al mèt wèlle sjrieve aon ’n theaterproductie? Of geveul veur sjrieve en veur humor, meh gein idee wieste ‘ne goojen teks op pepier zèts? Daan is dit de kans um dat te realisere. Veldeke Krink Mestreech en Revue aon de Maos zeuke naomelek sjrijvers veur de nui vastelaovendsrevue “Mestreech boe is de sjoenen tied nao touw” in fibberwarie 2023.

Veldeke en de Revue beeje daoveur e program aon dat start mèt ‘nen algemeine kinnesmakingsaovend op maondag 14 miert. Geïntrèsseerde make dao kinnes mèt zoewel Veldeke es de Revue, meh ouch mèt ‘t ‘sjrijversvak’. Bekinde Mestreechse theatersjrijvers vertèlle euver hun ervaringe en alliech is dao meugelekheid tot ’t stèlle vaan vraoge.

Lui die enthousias zien gewore nao deen aovend, kinne veur 22 euro drei workshops volge, ummertouw op ‘ne maondagaovend (11 aprèl, 9 mei en 13 juni). Nao de lèste bijeinkoms is ’t de bedoeling um concreet touw te wèrke nao bruukbaar scènes en sketches veur de Revue.

Ederein mèt leefde veur sjrieve en Vastelaovend, leefs mèt geveul veur humor, kin mètdoen. Foutloes Mestreechs sjrieve is neet nudeg, al zien de scènes wel in ’t dialek. Deilnumme aon de kinnesmakingsaovend kin door ‘ne mail te sjikke aon revueaondemaos@gmail.com. Gere ‘ne zelfgesjreven teks bijvoge, zoetot Veldeke en Revue al e bitteke weite welk vleis ze in de koep höbbe. D’n inhaajd is um ’t eve, es mer droet bliek wat iemes in ziene of häöre mars heet. Nao aonmelling volg ‘nen email mèt wijer informatie euver de kinnesmakingsaovend.