15 oktober 2020 Prizzentatie 'Van Sermoen tot Precessie'

Eigelek zouw Lou Spronck zien book prizzentere op de Jaorvergadering. Meh, wie bekind, höbbe veer de Jaorvergadering mote aofbloze. Daorum höbbe v'r Lou gevraog um zien prizzentatie op fèlm te zètte.

Zoe kint geer thoes nao zien prachtege verhaole luustere. 't Fèlmke vint geer op eus YouTube-kenaol.

Klik hei um nao eus YouTube kenaol te goon.

't Book vaan Lou Spronck 'Van Sermoen tot Percessie. Aajd Mestreechs: taal en teksten 1770-1840' is e nui book vaan de Veldeke Krink Mestreech mèt ’n bezunder verzameling aw tekste in ’t stadsdialek vaan Mestreech. Die collectie is uniek, umtot gein ander dialek in Limbörg en wied daoboete ziech op zoe’n sjat aon aajd dialekmattriaol kin berope.

D’n iersten teks is ’n heroetgaof vaan ’t Sermoen, boemèt de Mestreechse dialekliteratuur begint; de lèste is ’n advertentie vaan de börgersociëteit Momus, die in 1840 is opgeriech.

Es hors-d’oeuvre bij de aw dialektekste weure de taolleefhöbbers verras op ’n studie euver de historie vaan ’t Mestreechs en ’t Nederlands, gevolg door ’n besjrijving vaan de taolkinmerke vaan ’t Aajd Mestreechs. E klein lexicon vaan ’t Mestreechs roond 1800 weurt geserveerd es dessert.

'Van Sermoen tot Percessie' is te koup in euze Kiekoet.