Op goonsdag 29 miert, nao de jaorvergadering, hawwe veer 'n speciaol Algemein Ledevergadering (ALV) en wèlt 't bestuur eur goodkäöring vraoge um de statute vaan de vereineging Veldeke Krink Mestreech te wijzege.

Dees speciaol ALV vint plaots direk nao de jaorlekse ALV op goonsdag 29 miert, verwachde starttied 21.15 oor bij Select Hotèl Apple Park, Pierre de Courbertinweg 3 (neve Stadion de Geusselt)

Agenda Speciaol ALV

1. Opening
2. Touwliechting veurgenome statutewijzeging
3. Ingekoume vraoge/opmèrkinge inzake de veurgenome statutewijzeging
4. Stumming
5. Sleting

Aonmelle veur dees speciaol ALV kint via 't formuleer oonder aon dees pagina.

Boerum wèlle v’r de statute verandere?
Es vereineging maakste aofspraoke wieste geis samewèrke. Dees aofspraoke zien vasgelag in de zoegenaomde statute. In die statute steit oonder mie wat eus doelstèlling is en watste es bestuur en lid wel of zjus neet maags doen um dat doel te bereike. De statute vaan eus vereineging zien opgestèld in 1984 en in de aofgeloupe bekans 40 jaor neet veranderd.

Es bestuur wèlle veer gere de statute modernisere en e paar aofspraoke verandere. De statute zien neet mie vaan dezen tied. Zoe kóste veer in de corona-periood de ALV neet digitaol hawwe, umtot dat neet waor geregeld in de statute. Dat wèlle v’r noe verandere.

Neve de statutewijzeging wèlle veer ouch ’n Hoeshajdelek Rigglemint in ’t leve rope. In ’t Hoeshajdelek Rigglemint höbbe v’r aofspraoke, regels en riechlijne gezat es aonvölling op de statute. ’t Besjrijf de daogelekse gaank vaan zake. Veur ’t opzètte en verandere vaan ’t rigglemint hove v’r neet nao de notaris, wat tied en cent spaort. Es lid stump geer ouch euver d’n inhaajd vaan ’t rigglemint.

Wie geit ’t in zie wèrk?
Es bestuur mage veer neet zoemer de statute wijzege en ’n hoeshajdelek rigglemint opstèlle. De statute en ‘t rigglemint zien jummers aofspraoke dieste mèt ein in ‘n vereineging maaks. En dus moot geer es lid dao euver stumme. Daorum koume v’r op 29 miert bijein in ‘n speciaol ALV.

Um te kinne stumme moot op 29 miert mie es twiederde (2/3) vaan de lede aonwezeg of vertegewoordeg zien. Dat beteikent dus tot minimaol 670 lede aonwezeg mote zien deen aovend. Bij de opening vaan de vergadering weurt geloerd wieväöl lede dao zien of door iemes aanders weure vertegewoordeg. Es mie es 2/3 vaan de lede dao is, kint weure gestump.

Es daan mie es 2/3 vaan de aonwezege lede veur de statutewijzeging stump, kinne de statute weure gewijzeg. Es minder es twiederde (2/3) vaan de aonwezege lede veur de wijzeging stump, weure de statute veurluipeg neet veranderd.

Wat es 29 miert neet genóg lui dao zien?
Daan kinne v’r neet goon stumme en mote v’r ’n nui vergadering organisere. Bij die nui vergadering maak ’t niks oet wieväöl lede aonwezeg zien. De lede die daan aonwezeg zien, mage daan beslete um de statute wel of neet te wijzege.

Ouch daan gelt tot mie es twiederde (2/3) vaan de aonwezege lede véúr moot stumme um de statute denao bij de notaris te kinne wijzege. Es minder es twiederde (2/3) vaan de aonwezege lede veur de wijzeging stump, weure de statute veurluipeg neet veranderd.

Wat es geer neet debij kint zien?
De statute vaan noe laote ’t neet touw tot g’r de ALV digitaol kint bijwoene en/of digitaol kint stumme. G’r moot fysiek aonwezeg zien um te kinne stumme. Moch g’r neet kinne koume, daan kint g’r ’n aander lid machtege um naomes uuch te stumme. Völt daan 't volmachformuleer [link] in en gef ’t ingevöld formuleer mèt aon ’t lid dat naomes uuch geit stumme.

Eder lid maag mer veur maximaol 1 aander lid es gemachtegde stumme.

Wat wèlle v’r verandere in de statute?
De groetste veranderinge betröf:

• Bestuurslede kinne nog mer maximaol 2 kier weure herkoze.
• D’n termijn es bestuurslid geit vaan 3 jaor nao 4 jaor.
• ‘n ALV maag in de touwkoms ouch digitaol plaotsvinde
• In de touwkoms maag g’r ouch digitaol stumme
• Nui regels zien opgenome wie te handele es dao neet genóg bestuurslede zien of ‘ne veurzitter en/of notulis oontbrik.

Um te kinne stumme, daot g’r good draon um uuch te informere euver de veurgenome veranderinge. G’r kint daoveur de statute vaan noe [link] en de nui statute [link] vergelieke. Meh, v’r höbbe veur uuch ouch ’n euverziech mèt alle wijzeginge [link] gemaak.

Daoneve vraoge veer uuch ouch ’t Hoeshajdelek Riggelemint [link] door te leze.

Höb geer nog vraoge?
Höb geer vraoge en/of opmèrkinge euver de veurgenome veranderinge, gef us die daan ezzebleef zoe gaw meugelek door: info@veldekemestreech.nl. Eur vraog(e) en opmèrking(e) zalle v’r in de ALV wijer bespreke.

In verband mèt de organisatie vraoge veer uuch um us veur 22 miert door te geve of geer aonwezeg zeet bij dees speciaol ALV. Aonmelle daot g’r via 't formuleer hei oonder.

Mèt de vrunteleke compleminte,

Naomes ’t bestuur vaan Veldeke Krink Mestreech

Carlo Schrijnemaekers                                                Iwan Bruijnzeels
Veurzitter                                                                     Sikkertaris

AONMELLE
(Höb g'r uuch al aongemeld eur de Jaorvergadering daan hoof geer uuch neet nog 'ns aon te melle)