De dialekvereineging Veldeke Krink Mestreech heet in de aofgeloupe twie jaor 'nen oongeluifeleke ledegreuj doorgemaak. Get mie es twie jaor geleie leep 't lede-aontal nog eder jaor trök en stoont d'n tèller op 500. Dat aontal is noe verdobbeld; zoondagmiddag melde 't 1000e lid ziech aon. De Veldeke Krink Mestreech is daomèt ein vaan de groetste vereineginge vaan Mestreech gewore.
Beleid en doelstèlling
Volgens 't bestuur is de ledegreuj touw te sjrieve aon 'n aontal factore. Zoe heet de Veldeke Krink Mestreech 'n aontal veranderinge doorgeveurd en zien doelstèllinge bijgestèld. Door mèt d’n tied mèt te goon en gebruuk te make vaan modern touwpassinge, weurt ’n groeter publiek bereik. Zoe zien op d’n Digi-Dictionair, ’t online woordebook op veldekemestreech.nl, al zoe’n 270.000 wäörd vertaold en is Veldeke dèkser in de media te zien. Daoneve kriege lede korting op of veurrang bij activiteite en oetgaof.
Ummertouw mie lui wete de vereineging te vinde. 'n Aontal Mestreechter vereineginge, instanties en artieste heet oondertösse e samewèrkingsverband mèt de Veldeke Krink Mestreech es 't geit um 't publicere vaan tekste in 't Mestreechs. Zelfs Fabrizio wèrk veur ziene nuie cd same mèt Veldeke.
Identiteit
'nen Tendens is ouch tot Mestreechs sprekende lui z'ch ummertouw mie bewus zien vaan hun identiteit, welliech door 't feit tot zie lankzaam meh zeker in de minderheid rake in 'n stad die aon väöl veranderinge oonderheveg is. Zeker bij de jäög is dat good te zien; die sms'e en msn'e in 't Mestreechs en zelfs de allerkleinste kinne d'n teks vaan 'Sjiek is miech dat…' oet de kop mètzinge.
Cabberèt
't Veldeke Vastelaovends Cabberèt is oondertösse e begrip in Mestreech. Aofgeloupe week späölde de cabberètgróp weer zès oetverkochte veurstèllinge in de Bonbonnière. Door ledekorting en veurrang op kaarte veur 't cabberèt, wèrk dit evenemint es 'ne gigantische katalysator veur de greuj vaan 't ledebestand.
1001e lid
Oetgerekend op de lèste cabberètdaag, aofgeloupe zoondag, melde 't 1000e lid ziech aon. 'n Sjoen gelegenheid veur 't bestuur um veuraofgaond aon de aovendveurstèlling Zienen Hoegen Hoeglöstegheid, Prins Guy d'n 1e, 't 1001e (91x11) lidmaotsjap aon te beeje.
Agenda
16 fibberwarie 2011
Vastelaovends Cabberèt 2011 Boe: La Bonbonnière Wienie: 16 t/m 20 fib. 2011 ...'t doort nog eve, meh daan kint g'r dat al in eure nuie callepin notere!
Hortense Brounts nuie veurzitter
Iech zal ’t uuch mer metein vertèlle: Iech bin geinen echte
Mestreechteneer. Mien ma waor vaan Sint Gietere. In de ouge vaan echte
Mestreechtenere ’n boerin dus. En daobij kump nog ins, minstens eve
benkelek; iech bin neet binne de Singels gebore. Um zjus te zien: iech
bin óp 'ne singel gebore. Op d'n Hertogsingel um perceis te zien. Meh
aon de verkierde kant. Aon d'n euverkant zoegezag. En g’r wèt: de
singel is de grens en al wat dao boete vèlt, tèlt neet mèt. Noe zalt
g’r zègke: 'Zoe hawwe veer wel mer wieneg échte Mestreechtenere euver'.
Dat klop!
Tot geer miech – ‘n neet echte Mestreechse – zoonder
verzej tot veurzitter vaan de Veldeke Krink höb gekoze! Zjus noe, wie
de gezèt vol steit vaan deen échte Mestreechter Geis. Dee Mestreechter
Geis dee ederein dee neet hei gebore is in klaor taol liet wete tot ‘r
ziech neet demèt moot bemeuje. Allein wee de Geis heet, maag mètpraote.
En dat zien 'rs neet väöl, este de gezèt maags geluive...
