Veldeke Krink Mestreech zal in de naobije touwkoms de convocaties nao häör lede ouch digitaol goon versjikke. Dat wèl zègke tot geer, es g'r dat wèlt, euze pos neet mie per breef thoes krijg gesjik, meh op eur e-mailadres.
Zeet g'r lid vaan Veldeke Krink Mestreech en wèlt g'r in de touwkoms pos vaan us oontvaange via 't internèt, gef us daan eur e-mailadres door op info@veldekemestreech.nl. Vermelt daobij eure naom en adres, daan weite v'r zeker tot 't good kump. G'r krijg 'n bevesteging es eur e-mailadres is opgenome in eus databaank. Zoegaw de Krink Mestreech häör convocaties ouch digitaol geit versjikke, weurt g'r daovaan op de huugde gestèld.
Veur alle dudelekheid; Wèlt g'r de pos vaan Veldeke Krink Mestreech gewoen thoes gesjik blieve kriege, daan hoof g'r niks te doen.
E tiedsje geleie woort miech gevraog um 'ne column te sjrieve veur op dees site. Es Italiaon zeende voolt iech miech zier verierd, meh daoneve ouch e bitteke oonzeker umtot 't stök oongetwiefeld in 't Mestreechs mós weure gesjreve, en neet in mien eige vertrouwde 'Italiano'. Es iech leedjes sjrijf haw iech altied d’n Digi-Dictionair örges in beeld zoetot iech gaw de correcte vertaoling veur han höb. Daoneve laot iech ze, alveurens te publicere, controlere door Bèr Dictionair. Mochte d'r daan nog foute in zitte, kin iech häöm teminste de sjöld geve!
De lèste maond höb iech bekans oonaofgebroke zitte wèrke aon m’ne nuie cd mèt es titel: ‘Extra Kies’. De mieste vaan uuch zalle de link al gelag höbbe; 'ne pizza boe extra väöl kies op zit. Dao kin iech uuch, es iech zègk tot 't huuske oetzuut wie 'n pizzadoes en de cd wie 'ne pizza formaggio, gein oongeliek in geve.
Meh in de nui Mestreechter straottaol heet 'kies' nog 'n twiede beteikenis...
