Doelstèllinge

De groetste sociologe zien ’t d’r euver eins tot ’n taol de bepaolende bindingsfactor is vaan ’n cultuur of sameleving. Es v’r dat trök vertaole nao de Mestreechse situatie, kin me ’t daomèt haos neet ooneins zien. ’t Spreke vaan de Mestreechter taol is dinkelek de groetste reie veurwat of väöl Mestreechtenere ’t geveul höbbe Mestreechteneer te zien. Me steit dao allein neet ederen daag bij stèl...

De aonleiing veur de opriechting vaan de vereineging Veldeke Limburg waor te daanke aon ein gemeinsjappeleke doelstèlling. Naomelek: Het behoud en de bevordering van de Limburgse dialecten.

Veldeke Krink Mestreech heet dees doelstèlling in al die jaore neet oet ’t oug verlore. Väöl lui binne de vereineging (en ouch sympathisante daoboete) höbbe ziech ingezat um de nudege beuk en publicaties in ’t Mestreechs en ouch euver Mestreech meugelek te make. En daomèt de Mestreechter taol leveteg te hawwe.

De Krink Mestreech heet nog neet zoe lang geleie häör doelstèllinge bijgestèld um bij d’n tied te blieve. Deze website, en ’t touwgaankelek make vaan e groet deil vaan d’n dictionair dao-op, is ein vaan de rizzeltaote daovaan. Wijer heet de Krink Mestreech ziech ’t doel gestèld um z’ch ouch te riechte op e jonger publiek. Zie zien jummers de lui die allesbepaolend zien veur ’t leveteg hawwe vaan de taol en cultuur vaan eus stad.

De Mestreechter taol is de roejen draod in al eus activiteite. En dat zal ouch altied wel zoe blieve. Daorum wèl de Krink ’t gebruuk vaan ’t Mestreechs bevordere en stimulere. Veural ouch ’t leze en sjrieve daovaan. Neve de taol perbeert de Krink de belangstèlling veur de stad Mestreech bij Mestreechtenere te verhuge.
Agenda

16 fibberwarie 2011
Vastelaovends Cabberèt 2011
Boe: La Bonbonnière
Wienie: 16 t/m 20 fib. 2011

...'t doort nog eve, meh daan kint g'r dat al in eure nuie callepin notere!
Copyright © 2010 Veldeke Krink Mestreech