Veldeke Krink Mestreech organiseert veur häör lede eder jaor ’n aontal activiteite die in ’t verlengde ligke vaan eus doelstèllinge. Ze höbbe dus altied te make mèt eus taol of cultuur. De mieste vaan dees activiteite zien allein bij te woene door lede vaan de Krink Mestreech. Um uuch e beeld te geve vaan dees activiteite zalle v’r hei oonder ’n opsomming make:

Jaorlekse stadswandeling

De deilnummers kriege al wandelentere alderlei sjoen en soms oonbekinde stökskes Mestreech te zien. ’t Illemint 'speurtoch' späölt ’n groete rol. Veer ervare eder jaor weer tot lui ’t leuk vinde um al die oontdèkkinge te doen in hun eige stad.

Vastelaovends Cabberèt

Op dit momint mesjiens wel ein vaan eus bekindste activiteite! ’t Veldeke Vastelaovends Cabberèt weurt jaorleks e paar weke veur de vastelaovend opgeveurd door euze cabberètgróp in de Bonbonnière. Dit evenemint is euveregens ouch veur neet-Veldeke lede touwgaankelek. Veldeke lede kriege euveregens wel korting op de kaarte. Daobij weure zie ouch in staot gestèld um 'n week veur d'n officiële kaartverkoup al kaarte te koupe.

Binnekort kump op deze website ‘nen apaarte pagina euver ’t Vastelaovends Cabberèt, boe-op g’r foto’s kint bekieke en geluidsfragminte kint beluustere. Hajt ’t in de gate...

Lezinge

Eder jaor organiseert de Krink ’n paar lezinge, die dèks ouch weure gecombineerd mèt ’n dia- of fèlmprizzentatie. ’t Is ouch gebrukelek tot d’r op d’n aovend vaan eus jaorvergadering ’n lezing of prizzentatie weurt gehawwe. Aofgeloupe jaor hadde v’r de indrökwèkkende diaprizzentatie vaan Guus Reinartz. Bij de koumende jaorvergadering zal Lou Spronck de lezing verzörge.

Excursies

De lèste jaore hawwe veer ouch mie excursies. Op ’t program stoonte oonder andere de Apostelhoeve, Kestiel Eijsde, ’t Limbörgs Museum. In 2006 waor d’r ’n roondleiing door de Selvrouwekèrk. Dees excursies weure dèks ouch gecombineerd mèt ’n lezing en zien oetslutend touwgaankelek veur lede.

Keersemes

De Krink Mestreech heet ’n jaorelange traditie vaan ’t organisere vaan Keersaovende. De lèste jaore höbbe veer gemeind hei get aofwisseling in te mote bringe. Veur lede weurt allewijl ’n keerswandeling georganiseerd die aofgewisseld weurt mèt ’t vertèlle vaan keersverhaole door Jan Janssen en Rob Meurders. 't Aofgeloupe jaor wandelde veer door ’t Jekerkerteer.

Groet Mestreechs Dictee

In samewèrking mèt de Mestreechse Verkennersband organiseert de Krink ’t jaorleks trökkoumende Groet Mestreechs Dictee. Sinds ’t aofgeloupe jaor kinne ouch gróppe of vereineginge ziech hei veur aonmelle. Ederein is oetgenudeg, dus ouch neet-lede, um zien of häör kinnes vaan ’t gesjreve Mestreechs ins te teste. Dit evenemint vint miestal plaots in ’t veurjaor in ’t Centre Céramique. De perceizen daotum weurt vaan te veure bekind gemaak via euze website.