In 2004 is De Nuie Mestreechsen Dictionair oetgekoume. Dezen dictionair is gebaseerd op de nui Veldeke spelling, die in 1999 door ’t gemeintebestuur vaan Mestreech is erkind es de officieel spelling vaan ’t Mestreechs.

De Nuie Mestreechsen Dictionair besteit oet twie gedeiltes: Mestreechs-Nederlands en Nederlands-Mestreechs. In d’n Digi-Dictionair kint g’r gebruuk make vaan ’t Nederlands-Mestreechs gedeilte. ’t Zeukwoord moot dus altied e Nederlands woord zien.

In ’t geval tot g’r e werkwoord zeuk, zal d’n Digi-Dictionair metein de werkwoord-categorie debij vermelle. Es g’r dao daan weer op wijer klik, kint g’r de vervogingsvörm vaan ’t betreffende werkwoord vinde. Es d’r es rizzeltaot mie es ei werkwoord weurt gevoonde, daan heet de werkwoord-categorie altied betrèkking op 't iers geneumde werkwoord.

De meneer boe-op de versjèllende soorte werkwäörd in categorieje zien verdeild, is gans oetereingelag in ’t hoofstökske Werkwäörd oonder Dictionair en Spelling in ’t linker menu.

Soms zeet g’r achter e Mestreechs woord e getal stoon (1, 2, 3). Dit getal verwijs nao de beteikenis vaan dat woord, besjreve in ’t Mestreechs-Nederlands gedeilte vaan De Nuie Mestreechsen Dictionair. Es gebruker vaan d’n Digi-Dictionair kint g’r dees versjèllende beteikenisse (nog) neet opzeuke, umtot ’t Mestreechs-Nederlands gedeilte nog neet gedigitaoliseerd is. G’r kint hoegoet oet de aonwezegheid vaan e getal opmake tot ’t mierdere beteikenisse gief veur ’t betreffende woord.

In ’t geval tot e Mestreechs woord op versjèllende menere kin weure oetgesproke, zal 'n semi-fonetische spelling achter ’t woord tösse rechte häök weure weergegeve.

Veurbeeld:  aanhoren => aonhure [ao.n'hu.r∂], [aonhu'r∂]

De digitaol databaank vaan d’n Digi-Dictionair kin door de taolkemissie vaan Veldeke Krink Mestreech weure aongepas. ’t Kin daorum gebäöre tot d’r versjèlle zien tösse d’n Digi-Dictionair en de gedrökden dictionair bij uuch thoes.

Veldeke Krink Mestreech is veurnummes um d’n Digi-Dictionair in de touwkoms wijer oet te breie. Es hei-euver mie bekind weurt gemaak, zalt g’r dat op euze website trök kinne leze bij de nuitsberiechte.

Väöl plezeer bij ’t gebruuk vaan euzen Digi-Dictionair !